بالی وڈ کے لیجنڈ اداکار اور بگ بی کے لقب سے مشہور امیتابھ بچن نے چند روز کے لیے سوشل میڈیا سے دوری اختیار کرنے کا اعلان کردیا، جس کے بعد مداحوں میں تشویش پائی جا رہی ہے۔
بھارتی میڈیا رپورٹس کے مطابق امیتابھ بچن نے سماجی رابطے کی ویب سائٹ ایکس پر اپنے پیغام میں مداحوں سے معذرت کرتے ہوئے بتایا کہ انہیں آرام کرنے اور صحت یاب ہونے کے لیے چند روز کی چھٹی لینے کا مشورہ دیا گیا ہے، جس کے باعث وہ فی الحال کچھ لکھنے سے قاصر ہیں۔
اداکار نے اپنے پیغام میں کہا کہ وہ معذرت خواہ ہیں اور کچھ دن تک سوشل میڈیا پر متحرک نہیں رہ سکیں گے۔
میڈیا رپورٹس کے مطابق امیتابھ بچن نے ایک روز قبل اپنے آفیشل بلاگ پر بھی اسی نوعیت کا پیغام شیئر کیا تھا۔ ان کے اس اعلان پر مداحوں نے تشویش کا اظہار کیا ہے تاہم دستیاب معلومات میں ان کی صحت سے متعلق تفصیلات واضح نہیں کی گئیں۔