چین کے صوبے شانشی میں معاوضے سے عدم اطمینان پر ایک کسان نے بھاری مشینری کے ذریعے سرکاری عمارت پر حملہ کردیا، جس سے عمارت کے مرکزی دروازے کا ایک حصہ تباہ ہوگیا۔
برطانوی اخبار ٹیلی گراف کے مطابق 47 سالہ کسان نے پیر کی صبح ایکسکیویٹر چلاتے ہوئے انتظامی سروس سینٹر کے داخلی دروازے کو نشانہ بنایا۔ واقعے کی ویڈیو بھی سوشل میڈیا پر سامنے آگئی، جس میں مشین کو عمارت کا داخلی حصہ توڑتے دیکھا جاسکتا ہے۔
مقامی میڈیا کے مطابق واقعے کے دوران عمارت میں موجود ملازمین کو بحفاظت باہر نکال لیا گیا اور کوئی جانی نقصان نہیں ہوا۔ پولیس نے ملزم کو گرفتار کرکے تحقیقات شروع کردی ہیں۔
ایک سرکاری ملازم کے مطابق حملے کی ممکنہ وجہ مویشیوں کے فارم کو مسمار کرنے کے بدلے ملنے والے معاوضے پر عدم اطمینان تھا، تاہم پولیس نے تاحال اس دعوے کی تصدیق نہیں کی۔ واقعے کے بعد سرکاری دفتر میں معمول کا کام بحال کردیا گیا۔