اسلام آباد۔3جون (اے پی پی):ٹریڈ ڈویلپمنٹ اتھارٹی پاکستان ( ٹی ڈی اے پی) نے کہا ہے کہ فرانس میں منعقد ہونے والی بین الاقوامی تجارتی نمائش’’سیال فوڈ فیسٹیول ‘‘ میں شرکت کے لئے درخواستیں جمع کرانے کی آخری تاریخ 7جون ہے ۔ٹی ڈی اے پی کے مطابق 5 روزہ نمائش فرانس کےدارالحکومت پیرس میں19سے 23اکتوبر تک جاری رہے گی جس میں ، چاول ،دالیں ، مشروبات ، ڈیری مصنوعات ، گوشت ، سی فوڈ، فروزن فوڈ، پھل ، سبزیاں ، سنیکس اور زراعت سے وابستہ افراد و ادارے اپنی مصنوعات عالمی خریداروں کے سامنے پیش کرنے کے ساتھ ساتھ اپنے کاروباری معاملات طے کرسکیں گے ۔نمائش کے حوالے سے مزید تفصیلات اتھارٹی کی ویب سائٹ سے حاصل کی جاسکتی ہیں۔