وزیراعظم محمد شہباز شریف سے متحدہ عرب امارات کے معروف بزنس گروپ سجوانی گروپ کے وفد نے ملاقات کی، جس میں پاکستان اور متحدہ عرب امارات کے درمیان معاشی تعاون، سرمایہ کاری اور نجی شعبے کے اشتراک کو مزید فروغ دینے پر تفصیلی تبادلۂ خیال کیا گیا۔
اس موقع پر وزیراعظم نے کہا کہ پاکستان اور متحدہ عرب امارات کے درمیان گہرے، دیرینہ اور برادرانہ تعلقات قائم ہیں جو باہمی اعتماد اور احترام پر مبنی ہیں۔ انہوں نے کہا کہ عزت مآب شیخ محمد بن زاید النہیان کے حالیہ دورۂ پاکستان نے دونوں ممالک کے تعلقات کو مزید مضبوط کیا ہے اور دوطرفہ تعاون کے فروغ کے لیے ایک سازگار ماحول پیدا کیا ہے۔
وزیراعظم نے اس بات پر اطمینان کا اظہار کیا کہ حالیہ اعلیٰ سطح کے روابط اور تبادلوں کے نتیجے میں دونوں ممالک کے نجی شعبوں اور سرمایہ کاروں کے درمیان اعتماد میں اضافہ ہوا ہے، جس سے باہمی اقتصادی تعاون کے لیے ایک مضبوط بنیاد فراہم ہوئی ہے۔
انہوں نے کہا کہ حکومت پاکستان انفارمیشن ٹیکنالوجی، ڈیجیٹل جدت، بلاک چین اور دیگر ابھرتی ہوئی ٹیکنالوجیز کے شعبوں میں بزنس ٹو بزنس (B2B) تعاون کو خصوصی اہمیت دیتی ہے۔ وزیراعظم نے پاکستان کی ڈیجیٹل معیشت میں اماراتی سرمایہ کاروں کی بڑھتی ہوئی دلچسپی کا خیرمقدم کیا۔
وزیراعظم کا کہنا تھا کہ متحدہ عرب امارات کی سرمایہ کاری، جدت اور عالمی روابط، اور پاکستان کی افرادی قوت و صلاحیت، مل کر معاشی ترقی کے لیے نہایت مؤثر شراکت داری ثابت ہو سکتی ہیں۔
اس موقع پر سجوانی گروپ کے وفد نے پاکستان میں سرمایہ کاری اور معاشی شراکت داری کے مواقعوں سے بھرپور استفادہ کرنے اور تعاون کو مزید وسعت دینے کے عزم کا اعادہ کیا۔
وزیراعظم محمد شہباز شریف نے اعتماد کا اظہار کیا کہ دونوں ممالک کی سیاسی قیادت کی مضبوط حمایت اور نجی شعبے کے اشتراک سے پاکستان اور متحدہ عرب امارات کے اقتصادی تعلقات نئی بلندیوں کو چھوئیں گے۔
سجوانی گروپ کے وفد نے پاکستان میں پرتپاک استقبال اور بہترین میزبانی پر وزیراعظم کا شکریہ ادا کیا۔ بعد ازاں وزیراعظم نے وفد کے اعزاز میں ظہرانہ بھی دیا۔