پنجابی سی حرفی

Poet: Muhammad Akram Saqib
By: Akram Saqib, Sahiwal

ب۔ بادشاہ توں میرے دل دا تیرے ہتھ ایہدی اے مہار بیلی
موڑ اپنے ول لئے رخ ایہدا اینوں اپنا بنا لئے یار بیلی
ہر غیر دا پیر رہوے باہر توحید دے جندرے مار بیلی
بھجے تیرے ول ہی ہٹ ہٹ کے کر ایہو جیہا اس نال پیار بیلی
…………………………
ت۔ تمام جہان توں ہوئے غافل عاشق ناز تیرے شعور والےٍ
پیندے ہر ویلے پئے بھر بھر کے جام عشق شراب طہور والے
اناالحق آکھ کے چڑھے سولی ویکھ عشق شاہ منصور والے
نچے عشق وچ رومی بے خود ہو کدی بلھے شاہ قصور والے
……………………………
پ۔ پیار دی راہ وچ جھنگ بیلے اتے چڑھے چناں دیاں تاریاں نیں
کامیاب نیں عشق دی راہ دے وچ بھاویں ساہ راہواں وچ ہاریاں نیں
دتی جان تے جاناں مل گیا دسیا ایہو سچیاں یاریاں نین
رہنا گل اپنی تے سدا قائم گلاں بندیاں تاں ھی ساریاں نیں
…………………………………………..
ٹ۔ٹر دیاں راہ سلوک اتے کئی اڑچلاں مشکلاں آون ساہنویں
پل صراط تے حیاتی گذار دینی ہمت ہووی تے ایہ بھار چانویں
جنت دوزخ نام مقام دے ہن پھریں لبھدا نا ں ایہ نشاں راہویں
ذات اپنی وچ ہے لبھ جاندا جے نیت کر کے جھات پانویں
……………………………………
ث۔ثمر عشق دا اوڑک ملدا پر پہلے جگ ہنسایاں نیں
سر راکھ کناں وچ پین مندراں جنہاں سچیاں محبتاں پایاں نیں
کچے گھڑے ہی ونج مہانے ہون چھالاں عشق چناں جنہاں لایاں نیں
ریت تتڑی راہ دی پیر چمے اتے بیلیاں دیاں رسواٰیاں نیں
……………………………………………….

ج۔جوگی بنیاں جے یار لبھے سودا سستا اے مہنگا وپار نئیں
کم کار نا کوی وگار ہووے وہلے پھردیاں نوں کوئی اپار نئیں
پھڑ بین گلیاں وچ پھرناں ناگ میں دے نوں آوندی مار نئیں
جیہڑا وچ بیلیاں دے مل جاوے سوکھا ا س س توں ہور پیار نئیں
……………………………………..
چ۔چوروں قطب ہون اوہے جنہاں عقل سلیم عطا ہووے
ویچ اپنا آپ دین جیہڑے ودھ جنہاں وچہ ڈھیر وفا ہووے
اکھ اس نوں دیدار یار ہووے جیہڑی ودھ کے با حیا ہووے
خاطر دوجیاں آپ نوں کرے پچھے بندے اوسے دی واہ واہ ہووے
………………………………….
ح۔۔حج کر جے حاجی سداناں تے فیر حج نوں کی ہے جاناں
نماز دکھاوے دی تے دے چوانی لوکاں توں سخی سداناں
روزہ رکھ کے دسدیاں پھرناں اتے سنا سنا ذکر کماناں
اپنے آپ دی پوجا ثاقب ہے آپ تے ظلم کماناں
………………………………………….
خ۔خال خال ہی توڑ اپڑن ٹرے شوق دے نال جہان میاں
کوئی ٹردیاں تھک کے بیٹھ رہندا رجھ اپنی جاندا شان میاں
کوئی اپڑ کے نیڑے منذل دے چھڈ باہندا ای دھیان میاں
صرف اوہ حقیقت پان جیہڑے جگ توں نیویں سدان میاں
…………………………………………..
د۔دیہنہ میرے اودوں بدل گئے جدوں بیلی دی نظر کمال کیتا
گل لا میں کملی کوجھڑی نوں وچ دو جہاناں چا نہال کیتا
بھل اپنا آپ وی گیا مینوں انج سوہنے میرا حال کیتا
اوہنوں ویکھ کے کراں نماز ادا وضو اوس دی دید دے نال کیتا
………………………………………………………
ڈ۔ڈوہنگیاں رمزاں ناں آون مینوں میں تے سدھی گل ھلا باہناں
بیلی جیہڑا مینوں سبق دتا اوہو فقرہ ہک سنا باہناں
میرا وادھا تے گھاتا ہے ایہو جیڑا جگ نوں کھول وکھا باہناں
گھنے نکتیان والی گل لمی ہک نکتے وچ مکا باہناں
……………………………………………
ذ۔ذکر اوہندا ہے جان میری ،قطرہ قطرہ خون دا یار بولے
رگ رگ پئی لیندی نام اوہندا لوں لوں وچ اوہ ہی یار بولے
وچ اکھ دے روشنی وانگ وسے وچ روح دے اوہدا پیار بولے
وچ سوچاں دے رہی سوچ ہکو ہر سوچ دے وچ سرکار بولے
,………………………………
ر۔روپ بہروپ وٹا بہنا سوکھا ہے جی ولی سدا لینا
موجاں اس جہان تے کرن لئی دھونی دھوکے دی رما بہنا
خاطر مال متاع اس دنیا دے ایمان وی ویچ وٹا لینا
روز آخر جو ہوئے سو ہو ایس جگ تے مال کما لینا
…………………………………………
ز۔زور نئیں چلدا دلاں اتّے اتے سوچاں تے نہ لگدے پہرے نی
کنڈی دل دی بند رکھن والے رکھدے یاد خدا دی باہرے نی
رمز والا ہووے تے رمز دسے بے رمزے مریندے نعرے نی
انہیاں نوں وکھیندے پئے ہاتھی خاطر مال دی پیراں مارے نی
……………………………………….
س۔سوال نہ کرئیے دل دے وچ اتے اکھ تے ناں زبان والا
ہون اچیاں ماڑیاں یا ککھ کلیاںیاد رکھیے سبھ کجھ ڈھہن والا
سب مٹی انت نوں پئے مٹی بھاویں کیڈی کوئی اچی شان والا
آس اسے ہکے جد رہوے بندہ بن دا ہے تاں ایمان والا
……………………………………………….
ش۔شاہ میرے نال شان تیرے باہجھ تیرے نہ کوئی خیر پاوے
در دل دی بوہاری نال پلکاں جے سوہنا کدی ایتھے پیر پاوے
ساری عمر دی چاکری ذمے میرے بھانویں جگ سارا ویر پاوے
آدے در توں خالی نہ موڑیں شک مینوں جیڈے بھانویں غیر پاوے
…………………………………
ص۔صبر یعقوب ایوب والااتے ابراہیم والا ایثار نئیں
غلطی آدم والی تے رب ولوں ودھ شیطان توں کسے نوں مار نئیں
بیڑی وچ سوراخ جے ہون چوکھے اوہ اوڑک لگدی پار نئیں
جیہڑی اپنے سائیں دے کرے ننداں اوہ ووہٹی کدے وفادار نئیں
……………………………………….
ض۔ضد تے اڑیا رہے جیہڑا او وانگ شیطان ملعون ہووے
جیہڑا من لوے اوہ بنے کامل تے وانگ جناب ذوالنون ہووے
بخیلی کر کے جوڑے مال جیہڑا اوہدا حشر نال قارون ہووے
وڈا سمجھ کے کیتا غرور جیہڑے اوہ ساتھی ضرور فرعون ہووے
………………………………………………….
ط۔طفل نحیف جئے بن جائیے سب لوڑاں مالک لوڑدا ای
آپے دے روزی تے کرآئے سیوا آپے پکڑ انگلی اوہ ٹور دا ای
بھانویں کل نوں اوہ شداد بنے اوہنوں تختے تے وی ناں بوڑدا ای
واڈا سمجھن لگ پئے آپ نوں جو مالک ہتھ اودوں ہی چا چھوڑ دا ای
……………………………………………..
ظ۔ظن کرناں اوڑک ناں چنگا ایہہ وچ قران دے آیا ہے
غیبت کرنی بھائی دا ماس کھانا ایہہ رب رسول سمجھایا ہے
پردہ پانا بھائی دے عیباں اتے اللہ پاک نے ایہہ فرمایا ہے
نیویں بن کے زندگی گزار دیئے ایہہ جان مال پرایا ہے
………………………………………..
ع۔عیب جوئی تے چسکے چغلیاں دے پلے ککھ وی ناں رہن دیندے
ہوون حسد بغض جے دل اندر نیڑے رب دے مول ناں جان دیندے
کھاہدے حق یتیماں مسکیناں دے سکھ نال گھڑی ناں با ہن دیندے
کردے دوجیاں ول ایہہ جو انگل اپنے ول اوہ ناں جان دیندے
……………………………………………..
غ۔غرق پریت دے وچ ہو کے ہووے جیہڑی نماز اوہ تار دیوے
وچ رہ کے اسے حالت دے اٹھ پہر دن دے گزار دیوے
توڑے عہد ناں کیتے نماز اندر ایہہ سبق ناں کدی وسار دیوے
میاں انج نماز ہے قائم ہوندی توفیق جیہنوں سوہنا یار دیوے
……………………………………………….
ف۔فرق کرن وچ دین دنیا اوہ بندے ہمیش ناکام ہوندے
گلاں نال ولی بنن والے اج کل بڑے نیں عام ہوندے
پچھے دنیا دین ویچ دیندے جیہڑے پیسے دے غلام ہوندے
بھانویں ملاں تے بھانویں فقیر ہووے دنیا دار کدی ناں تام ہوندے
………………………………………………..

ق۔قبلہ کعبہ جیہنوں من لئے مڑ اس دے ہو کے جیوئیے جی
اوہ جو آکھے اوہو کر جایئے بھاویں جام شراب دے پیویئے جی
بھانویں جائے مسجد بھانویں جائے مندر چیلے اس دے ہی سدیوئیے جی
آس ہک تے رہوے تے جان نکلے تاں اگلے جہان بخشیویئے جی
…………………………………………..
ک۔کی جانن اوہ یار اوس نوں جینہاں مال نون یار بنایا ای
اوہدے پیار دی کی ہے سار اوہنوں جنہیں دنیا دے نال پیار پایا ای
چنگے مال تے لماں ختم پڑھنا تے غریباں واسطے پڑھیا پڑھایا ای
دانے والیاں کملیاں نوں کہن عاقل ایہنہ اپنا عقل گنوایا ای
……………………………………………………
گ۔گور توں وڈی نہ ہور حقیقت جیہنوں شک ہووے ایس توں بچ جاوے
سپ ٹھوئیں منہ زور ہین اوتھے ڈنگ لوں لوں دے وچ رچ جاوے
ایندے وچ حساب ہے اس دینا حق کسے دا جیہنوں پچ جاوے
باغ جنت دا اوس دے واسطے ہے عشق سوہنے دا من وچ رچ جاوے
…………………………………………
ل۔لوح قلم تے جو ہے لکھیا اوہ ہوونوں مول نہ ہٹ دا ای
عزرائیل دے کم جو ذمے لگا اوہ موت دے رسے پیا وٹدا ای
وعدہ رب دا مول نہ خطا جاوے نہ کوئی اوس دے وعدے دے مٹ دا ای
قائم رب دی ذات رہوے ایتھے باقی ہر کوئی ڈیرے پٹ دا ای
………………………………..
م۔موج وچ اپنی رہن اوہے جینہاں عشق رب دے نال کیتا
کوئی غم فکر اس دنیا دا آدے واسطے ناں وبال کیتا
مل جائے تے شکر رہن کردے بھکے رہ کے صبر کمال کیتا
جان جاندے امانت ایہ اس دی وعدہ الست دا جس دے نال کیتا
…………………………………………..
ن۔نار جہنمی وچ پین اوہ تاں جناں حکم ربی جھٹلایا ای
منہ موڑ ٹر پشاں گئے جداں پییارے محبوب بلایا ای
جیہڑے نال ٹرے صدیق بنے اتے کوئی فاروق کہایا ای
عثمان ذوالنورین ہویااتے کوئی مشکل کشا سدایا ای
………………………………………….
و۔واہ واہ رحمت تیری مولا جیہڑی میں کملے تے ہوئی
لکھدیاں لکھدیاں ایتھے آیا اتے راز نہ رکھیا کوئی
سمجھ ایتھے آکے کجھ کجھ آئی کیوں سسی تھل وچ موئی
تے ہیر سلیٹی رانجھا رانجھا کردی کیوں آپے رانجھا ہوئی
………………………………………..
ہ۔ہتھ پکڑ میرا میرے مالکا وے مینوں سیدھی راہ تے پا سوہنا
جھوٹ مکر فریب توں جان چھتے سچ کہن دا ول سکھا سوہنا
انعمت علیھم دے نال رکھیں ضألین تون لئے بچا سوہنا
کرم اپنا میں تے خاص کریں دل غیر ولوں دے ہٹا سوہنا
………………………………………
ی۔یاد تیری اتے ذکرتیرا مولا ہر ویلے کردا مین رہواں
ناں تیرا دل وچ وس جاوے بھاوین اٹھاں تے بھانویں میں بہواں
ہر ساہ دے نال تینوں یاد کراں بھاویں جاگاں تے بھاویں میں سواں
روح قبضویلے میرے مالک ناں تیرا ہی اس ویلے میں لواں
………

Rate it:
12 Jul, 2018

More Punjabi Poetry

POPULAR POETRIES

FAMOUS POETS
About the Author: akramsaqib
I am a poet,writer and dramatist. In search of a channel which could bear me... View More
Visit 87 Other Poetries by akramsaqib »

Reviews & Comments

Language:    

My Page! Account Login:

(Post your Comments Immediately)
Email
Password
Do not have MyPage! account? Create Now

Guest Login:

(Comments will be online after Moderator Review)
Name
Email
City
Language:    

My Page! Account Login:

(Post your Comments Immediately)
Email
Password
Do not have MyPage! account? Create Now

Guest Login:

(Comments will be online after Moderator Review)
Name
Email
City