اے دوست میرے واسطہ بس یہ دعا کر
Text size
اے دوست میرے واسطہ بس یہ دعا کر
کیفی کو الہی غم محبوب عطا کر
کچھ اشک ندامت کے سوا پاس نہیں ہے
لایا ہوں میں دامن میں یہی سجا کر
یہ اشک ندامت بھی بڑی چیز ہے اے دل
آنکھوں میں چھپا لے در مقصود بنا کر
اک بار ہے دل کھول کے رونے کی تمنا
سر روضہ اقدس پہ ندامت سے جھکا کر
عشاق مدینہ کی دعا ہے یہ خدا سے
جنت میں عطا ہم کو مدینہ کی فضا کر
کچہ اسوہ حسنیٰ پہ عمل بھی تو کر اے دل
یہ فرض محبت ہے اسے بھی تو ادا کر
دنیا کی ہر اک چیز نگاہوں سے چھپا دے
یا رب رخ پر نور کی تصویر دیکھا کر
توصیف کا حق کیا ہو ادا تیری زباں سے
بس ورد زباں صلی علیٰ صلی علیٰ کر