نعتِ پاکِ مصطفیٰ ﷺ

یہ تبسّم اچھا نہیں اور یہ ہنسی اچھی نہیں
ہو نہ عشقِ مصطفیٰ تو زندگی اچھی نہیں

بھیجیے اُن پر درود اور بھیجیے اُن پر سلام
چارروزہ زندگی میں خامشی اچھی نہیں

نورِ عشقِ مصطفیٰ سے دل نہ ہو روشن اگر
ظاہری دنیا کی ہر اک روشنی اچھی نہیں

ذکر و فکرِ مصطفیٰ سے دور کردے جو ہمیں
ایسا غم بے کار ایسی دل لگی اچھی نہیں

جس کے دل میں کچھ بھی نہ ہو عظمتِ شاہِ رُسل
ایسے انساں سے سراسر دوستی اچھی نہیں

روئے انور کے تصوّر میں جو ہیں کھوئے ہوئے
اُن کی نظروں میں گلوں کی تازگی اچھی نہیں

جن کو خارِ دشتِ طیبہ سے ہے مطلب دوستو!
اُن کی نظروں میں گلوں کی دل کشی اچھی نہیں

کردے جو غافل رسول اللہ کے فرمان سے
مردِ مومن کے لیے وہ بے خودی اچھی نہیں

قبر کے اندھیاروں کو جو کرسکے نہ دور ، وہ
دوستو! تہذیبِ نَو کی روشنی اچھی نہیں

سُنّتِ نبوی کے جو برعکس ہی تعلیم دیں
حق کے متوالوں کو اُس کی پیروی اچھی نہیں

لِکھ سکے نہ جو مُشاہدؔ نعتِ پاکِ مصطفیٰ
فکر ناقص اور اُس کی شاعری اچھی نہیں