چبھن سے درد سے قربت بڑھا رہا ہے کوئی

Poet: اہتمام By: اہتمام, Hyderabad

چبھن سے درد سے قربت بڑھا رہا ہے کوئی
دیار دل سے کہیں دور جا رہا ہے کوئی

سمندروں سے کہو کشتیاں ڈبو ڈالیں
ہماری موت کے قصے سنا رہا ہے کوئی

اسے بتاؤ خوشی دیر تک نہیں رہتی
مرے غموں پہ بہت مسکرا رہا ہے کوئی

مرا ہی نام نہیں ہے مری کہانی میں
کہ مجھ سے ذات کو میری چھپا رہا ہے کوئی

کسی کی یاد کے جالے ہیں میرے حجرے میں
اداسیوں سے مرا گھر سجا رہا ہے کوئی

تمام شہر میں اک گھر یہی تھا الفت کا
یہاں بھی موت کا بستر بچھا رہا ہے کوئی

مرے لہو کو چھڑک دو تمام گلشن میں
مری وفاؤں پہ انگلی اٹھا رہا ہے کوئی

میں اس سے بات تو کر لوں رکو ذرا صادقؔ
مرے دروں سے صدائیں لگا رہا ہے کوئی

Rate it:
Views: 0
17 Nov, 2026
More Ahtamam Sadiq Poetry