Chasham Khuban Khamushi Mein Bhi Nawa Pardaz Hai

چشم خوباں خامشی میں بھی نوا پرداز ہے
سرمہ تو کہوے کہ دود شعلۂ آواز ہے

پیکر عشاق ساز طالع نا ساز ہے
نالہ گویا گردش سیارہ کی آواز ہے

دست گاہ دیدۂ خوں بار مجنوں دیکھنا
یک بیاباں جلوۂ گل فرش پا انداز ہے

چشم خوباں مے فروش نشہ زار ناز ہے
سرمہ گویا موج دود شعلۂ آواز ہے

ہے صریر خامہ ریزش‌ ہاۓ استقبال ناز
نامہ خود پیغام کو بال و پر پرواز ہے

سرنوشت اضطراب انجامی الفت نہ پوچھ
نال خامہ خار خار خاطر آغاز ہے

شوخی اظہار غیر از وحشت مجنوں نہیں
لیلیٰ معنی اسدؔ محمل نشین راز ہے

نغمہ ہے کانوں میں اس کے نالۂ مرغ اسیر
رشتۂ پا یاں نوا سامان بند ساز ہے

شرم ہے طرز تلاش انتخاب یک نگاہ
اضطراب چشم برپا دوختہ غماز ہے