بچوں میں اچھے ناموں کے اثرات بھی ہوتے ہیں ! ایسے نام جن کے معنی بچوں کی شخصیت کو نکھارے

بچوں کی پیدائش کے بعد ان کے ناموں کا انتخاب والدین کے لیے سب سے زیادہ اہمیت کا حامل ہوتا ہے، کچھ والدین تو پہلے سے ہی سوچ لیتے ہیں کہ ان کے بچے یا بچی کا نام کیا ہوگا جبکہ بہت سے ماں باپ بچوں کی پیدائش تک کا انتظار کرتے ہیں اور پھر ان کے لیے کسی اچھے معنی والے نام کو منتخب کرتے ہیں۔ یہ بات سب کے علم میں ہے کہ بچوں کی شخصیت پر ناموں کا گہرا اثر ہوتا ہے، پہلے زمانے میں بہت سے والدین بنا سوچے سمجھے بچے کا نام رکھ دیا کرتے تھے، انہیں ناموں کا مطلب بھی نہیں پتہ ہوتا تھا، بس جو سننے میں اچھا لگا وہ نام رکھ دیا گیا لیکن آج کا دور پہلے زمانے سے کافی حد تک مختلف ہے

عوام میں شعور آچکا ہے کہ کس قسم کے نام بچوں کے رکھنے چاہیئیں تاکہ ان کی شخصیت میں نکھار پیدا ہو سکے۔ آج ہم آپ کو بچوں کے کچھ ایسے نام بتانے والے ہیں جو سننے میں بھی اچھے لگتے ہیں اور ان ناموں کا مطلب بھی بہترین ہوتا ہے۔

1: یٰسین/ یاسین  (Yaseen)

یٰسین قرآن پاک کی سورہ مبارک ہے۔ بہت سے والدین نے اپنے بچوں کے لیے اس نام کا انتخاب کیا کیونکہ یہ ''ہمارے پیارے نبی حضرت محمد ﷺ کا لقب ہے''۔ یہ نام انتہائی مبارک ہے جبکہ سورہ یٰسین کو سب سے افضل کتاب ''قرآن مجید کا دل'' بھی کہا جاتا ہے۔

2: عمارہ (Ammara)

عمارہ عربی زبان کا انتہائی خوبصورت نام ہے، یہ ایک مختصر اور خوبصورت نام ہے، گو کہ یہ کوئی نیا نام نہیں لیکن پھر بھی اس کی انفرادیت قائم ہے۔ نام کے معنی کے اثرات چانکہ شخصیت پر اثر انداز ہوتے ہیں لہٰذا اس نام کا مطلب اچھا ہونے کی وجہ سے کئی والدین اپنی بیٹیوں کا رکھنا پسند کرتے ہیں۔ عمارہ کے معنی ہیں ''وقت کی پابند، فرمانبردار، تابعدار''۔

3: شافع  (Shafay)

شافع لڑکوں کا نام ہے جس کا تعلق عربی زبان سے ہے۔ یہ نام مختصر ہونے کے ساتھ ساتھ پکارنے میں انتہائی اچھا لگتا ہے۔ شافع کے معنی کے حوالے سے بات کی جائے تو اس نام کے مطلب ہیں ''شفاعت''۔ حالیہ دور میں یہ نام کافی سارے والدین نے اپنے بیٹوں کی پیدائش پر رکھا۔

4: وردا (Warda)

لڑکیوں کا وردا نام انتہائی مقبول ہے۔ اس نام کے معنی بھی نام کی طرح مختصر لیکن مکمل ہیں۔ وردا کا مطلب ہے ''سر پرست ، محافظ''۔ ماں باپ اس نام کے مطلب کی وجہ سے یہ اپنی بچیوں کا رکھنا پسند کرتے ہیں۔

5: عظم (Azm)

عظم لڑکوں کا کافی منفرد نام ہے، یہ نام بہت سے لوگوں نے سنا بھی نہیں ہے لیکن اس کے مطلب بہت ہی خوبصورت ہیں۔ عظم عربی زبان کا نام ہے جس کے معنی ہیں ''بزرگی، بڑائی، شان''۔ بچوں کا یہ نام رکھنے کی سب سے بڑی وجہ اس کا مطلب ہی ہے۔

6: زمل (Zimal)

زمل لڑکیوں کا نام ہے جو کہ پکارنے میں بہت منفرد اور خوبصورت لگتا ہے۔ اس نام کے معنی ہیں ''پردہ''۔ زمل عربی زبان کا مختصر سا نام ہے۔

7: شارق  (Shariq)

شارق لڑکوں کا نام ہے، اس نام کا تعلق عربی زبان سے ہے۔ شارق کا مطلب بھی بہت اچھا ہے جس کی وجہ سے والدین اپنے بچوں کے لیے اس نام کا انتخاب کرتے ہیں، شارق کے معنی ہیں ''چمکنے والا، آفتاب''۔

8: امیمہ (Umaima)

امیمہ اردو زبان کا مختصر سا نام ہے، اس نام کے معنی ہیں ''ہدایت دینے والی، رہنمائی كرنے والی، سيدھی راہ دكھانے والی'' جبکہ یہ نام حضور اقدس سرور كائنات حضرت محمد صلی اللہ عليہ وسلم كی سگی پھوپھی كا نام بھی ہے۔ یہ نام پرانا ہے لیکن آج بھی بہت زیادہ رکھا جا رہا ہے۔

9: ابراہیم  (Ebrahim)

عربی زبان کا نام ابراہیم ایک خوبصورت نام ہے۔ یہ نام ایک پیغمبر کا ہے۔ جو والدین یہ نام اپنے بیٹوں کے لیے منتخب کرتے ہیں ان کی شخصیت حضرت ابراہیم علیہ السلام جیسی مضبوط ہوتی ہے۔

10: سیرت (Seerat)

سیرت بھی ایک مختصر اور پیارا نام ہے جو بہت سے والدین اپنی بیٹیوں کا رکھتے ہیں۔ سیرت کے معنی ہیں ''اوصاف، وصف، کردار''.