آس ہو گی نہ آسرا ہو گا

آس ہو گی نہ آسرا ہو گا
آپ ہوں گے نہ آپ سا ہو گا

خون بہنے لگا ہے نہروں میں
شیخ جنت میں آ بسا ہو گا

اپنے کردار پر نظر رکھنا
وقت اچھا، کبھی بُرا ہو گا

قتلِ ناحق سے کر دیا انکار
"سرفروشوں" میں سر پِھرا ہو گا *

اک ضرورت خدا کی ہے ہم کو
تُو نہ ہو گا تو دوسرا ہو گا

- اِبنِ مُنیبؔ

* شاید فدائی حملوں کے لئے برین واش کر کے بھیجے جانے والوں میں ایسے بھی ہوتے ہوں جو اپنے ارد گرد معصوموں کو دیکھ کر دھماکہ کرنے سے انکار کر دیتے ہوں۔