رب دی یاد

 بیلی بنیئے مولا دے تاں مول نہ رہندا رنج
روز ولیمے کھائیے رج کے راتیں چڑھیئے جنج

رب دی یاد دا رس بناوے کانا، گنا پونا
جیہڑا چڑھدا عشق دی بھٹی لوہیا بندا سونا

رب دی یاد دی دولت ساری دنیا نالوں وڈی
جہندے دل وچ ایہہ سماوے ویکھے ول نہ ہڈی

رب دی یاد دے دریا اندر جے کر روح نہاوے
میل کچیل نہ دنیا والی اس دے ولے آوے

رب دی یاد حصار بنا کے جے کرے رکھوالی
کوئی ناں چلے بندے اتے چال شیطاناں والی

رب دی یاد ہے ایویں جیویں وچ بہشتاں رہناں
فکراں، رنجاں مول ناں اوناں، وچ سکون دے بہناں

رب دی یاد دا سرمہ جے کر اکھیاں نوں مل جاوے
چوداں طبق اوہ مالک آپے بندے نوں وکھاوے

رب دی یاد چ جیہڑا جیوے ، موت وصال دی پاوے
پل صراتاں اتوں وانگوں بجلی لنگدا جاوے

رب دی یاد دا دیوا جے کر دل دے وچ بل جاوے
صدیاں تیکر چھاون والا نس ہنیرا جاوے

رب دی یاد دے نال پرندے وچ اسماناں اڈھ دے
نالے جھومن نال خوشی دے رکھ دوالے مڈھ دے

رب دی یاد ہے مرتضائیؔ سب توں وڈی دولت
انہدے اگے ہیچ حکومت، دولت نالے شہرت