مالک دے دربار

کھاویں پیویں چنگا چوسا، پہنیں ہار سنگھار
ون سونی چیزاں دا توں کردا پھریں بیوپار
ہر دن تیرا لنگدا اے جیویں لنگدا اے تیو ہار
یاد رہیا نہ تینوں جا نا مالک دے دربار
مالک دے دربار جانا ، مالک دے دربار
اکھ تری وچ لالچ آئی، دل وچ بے سکونی
چھوٹی گل نوں وڈی جانیں، وڈی نوں نیونی
جنت دا شہزادہ لے گئی دنیا دی چمونی
مار پتھلا قابض ہوئی، کیہہ اندر کیہہ بار
مالک دے دربار جانا ، مالک دے دربار
جگ اوس دی کرنسی کیسے توں کدی ناں پائی
چہگابھریا مٹی دے نال، مٹی تری کمائی
دولت دل دی مالک دتی، وچ بازار گوائی
اک دن تینوں جانا پینا چھڈ تے سب سنسار
مالک دے دربار جانا ، مالک دے دربار
میل کچیل توں کھائی جاویں، پہن کے ستھرے کپڑے
ریشم، مخمل پہنن والے ویکھ کتھے جا اپڑے
نفس نے اُنس نوں مار مکایا ، کر کے سٹیا ڈکرے
ھاواں وچ ہوا دے اندر بدلاں دے پکار
مالک دے دربار جانا ، مالک دے دربار
مالک تینوں پیدا کیتادے کے نور شعور
اپنے نفس دے ہتھوں آپے ہو گییوں مجبور
شیشہ رب دے ویکھن والا کیتا چکنا چور
مالک باہجوں بندیا تیرا سب کج ہے بے کار
مالک دے دربار جانا ، مالک دے دربار
آدمؑ ، حواؑ دے جائے ویکھو رات دنے پے لڑدے
جنت دے گلاب نے جا کے دوزخ وچ پئے سڑدے
موڑ موڑ کے واعظ تھکے پر ایہہ نییؤں مڑ دے
نفرت والی دل دے وچو ں ڈھا دیوو دیوار
مالک دے دربار جانا ، مالک دے دربار
دنیا دے سرائے اندر بندیا توں پروہنا
پکیاں اِٹاں، پکیاں کنداں تیرا منہ چڑوھنا
جوگی والا پھیرا ایتھے ، مڑ کسے نیئں اونا
ایہناں تھاواں نال ہے تیرا حدوں ودھ پیار
مالک دے دربار جانا ، مالک دے دربار
مالک دے دربار دے بندیا سکھ لے کج آداب
دولت ، دنیا دی محبت، دلدل تے گرداب
لبھ لے دل دی دولت جیہڑی دولت ہے نایاب
خدمت خلقت رب دی ہووے تیرا کاروبار
مالک دے دربار جانا ، مالک دے دربار
چھڈ دو رنگی توں تے آ جا یک رنگی دے اندر
ایہو تینوں سبق سکھاون چرچ، مسیت تے مندر
باہروں جیسا دسیں بندیا ویسا ہوویں اندر
اک چہرے دے پچھے لکے چہرے بے شمار
مالک دے دربار جانا ، مالک دے دربار
نفس ، شیطان نے بیلی تیرے ، دنیا تیری حور
کھوتے، گھوڑے اک برابر ، پُٹھے نیں دستور
صدیاں دی سولی تے ٹنگے بندے بے قصور
ظلم ستم ، تے جبر قہر دی ہر پاسے للکار
مالک دے دربار جانا ، مالک دے دربار
دنیا دی ایس کھیڈ نوں بندیا توں حقیقت منیا
دنیا دے کماں وچ ایویں توں گیاں ایں ونیا
خواہش دے کباب نوں ناں وچ تیل طریقت رنیا
توں نکتہ ایں مرکز والا دنیا اے پرکار
مالک دے دربار جانا ، مالک دے دربار
بخشیں سانوں رب سوہنے تے کج نئیں ساڈے پلے
باہجوں حضرت سرور عالم ؐ گولے اسیں نگلے
صدقہ نیکاں روحاں د ا تے ٹوریں جنت ولے
مرتضائیؔ تے وی ہووے نظرِ کرم ہر وار
مالک دے د ربار جانا ، مالک دے دربار