مهڪندڙ گل ڦل هوا ۽ چاندني

مهڪندڙ گل ڦل هوا ۽ چاندني
چيٽ جون راتيون چڙا ۽ چاندني

سمنڊ لهرون شور برپا جابجا
سونهن سوڀيا معجزا ۽ چاندني

بند ڪمرو ڪينواسن جو هجوم،
شعبدو-مصور ڪلا ۽ چاندني.

ياد ڪنهنجي دل ڳهيليءَ تي هُري،
اک ڀِنيءَ جي انتها ۽ چاندني.

ذهن کي احساس پاران سوکڙي،
شاعري وکريل پنا ۽ چاندني.

تو ڏنا بوسا ڳلن ۽ چَپ تي،
اُڀ تان تارا لٿا ۽ چاندني.

وقت واريءَ جيان هٿن مان ويو ڇڻي،
بس بچون يادون، اسان ۽ چاندني.