نوعِ بشر کی آبرو

ذاتِ رسولِ پاک ہے نوعِ بشر کی آبرُو
پُر نور رُخ کی اک جھلک حُسنِ نظر کی آبرُو

مثل مہرومَہ کہوں کس طرح روئے پاک کو
ہے جب کہ ان کے تلووں سے شمس و قمر کی آبرُو

یاد رُخِ حبیب میں چھلکیںنہ اشک آنکھ سے
قائم ہے ضبطِ اشک سے دیدئہ تر کی آبرُو

شوقِ زیارتِ رسول میری متاعِ بے بہا
عشقِ حبیٖبِ کبریا ، زادِ سفر کی آبرُو

ہر درد کی ہے دوا سوزشِ عشق مصطفیٰ
کیفِ و نشاطِ جاوداں ، قلب و جگر کی آبرُو

رب کی عطا سے آپ پر ہر اک نہاں ہوا عیاں
ہر بے خبر کی آبرُو ، ہر با خبر کی آبرُو

عَرَقِ بدن گلاب میں ، آپ کا مہکے یا نبی
خوشبوئے زُلفِ مشک بُو ، بادِ سحر کی آبرُو

مقصد مُشاہدؔ اپنا ہے نعتِ رسولِ کبریا
کلکِ رضا ہے جس طرح حُسنِ ہُنر کی آبرُو