کِسے ہجر کے ہم فسانے سنائیں

کِسے ہجر کے ہم فسانے سنائیں
تیری یاد آئے تو سب بھول جائیں

یہ کیوں اجنبی بن کے پھرتے ہیں ہم تم
تعلق اگر ہے ، تو اُس کو نبھائیں

رہو تم سدا سائبانِ دعا میں
ہمیشہ رہیں دُور تم سے بلائیں

کِھلے جا رہے ہیں ، کِھلے جارہے ہیں
شگوفوں سے کیا کہہ رہی ہیں ہوائیں

حقیقت اُسے کون سمجھائے جا کر
مرے نام ہی لکھ دو ساری جفائیں

ہر اک دل گرفتہ ، ہر اک آنکھ نم ہے
مرے شہر کی رو رہی ہیں فضائیں

ڈھلے دن تو اکثر تیری یاد آئے
صدفؔ ہم چراغِ محبت جلائیں