گیس کی لوڈ شیڈنگ

اگر جاڑے کے موسم میں کوئی تہوار ہوتا ہے
منانے کے لیے پتھر کا دل درکار ہوتا ہے

جو سردی میں صبح اٹھ کر نہائے سرد پانی سے
وہ بندہ خبط کا مارا بہت جی دار ہوتا ہے

لباس بیش قیمت کی نمائش پر مچلتا ہے
گرم کپڑوں تلے پوشیدہ جب شاہکار ہوتا ہے

اکڑ جاتی ہے گردن، کلف لگ جاتا ہے کالر میں
کوئی کم ظرف جب شامل یہاں دربار ہوتا ہے

سبھی گیزر، سبھی چولہے ترستے ہیں سلگنے کو
بڑی مشکل سے ان کو آگ کا دیدار ہوتا ہے

شروع جب سے ہوئی ہے لوڈ شیڈنگ گیس کی اشہر
یہاں ہانڈی کا چڑھ جانا بہت دشوار ہوتا ہے