ہمیں بھی مدینے بلا میرے اللہ

ہمیں بھی مدینے بلا میرے اللہ
ہمیں بھی زیارت کرا میرے اللہ

گناہوں سے ہم کو بچا میرے اللہ
کہ نیکی کی رہ پر چلا میرے اللہ

نہیں کوئی تیرے سوا دوسرا اور
فقط ایک تو ہے خدا میرے اللہ

لیے بیٹھے ہیں جستجو دل میں کب سے
ہمیں بھی مدینہ دکھا میرے اللہ

نہیں مانگنا آتا کچھ بھی ہمیں تو
بنا مانگے کر دے عطا میرے اللہ

نہیں کوئی تیرے سوا میرا مولا
کہ بگڑی یہ میری بنا میرے اللہ

مری زندگی میں نہ آئیں کبھی غم
سنو آکے میری صدا میرے اللہ