ہم نے چمپی کرا کے دیکھ لیا

اچھا شیمپو منگا کے دیکھ لیا
تیل عُمدہ لگا کے دیکھ لیا
ہم نے چمپی کرا کے دیکھ لیا
پستہ بادام کھا کے دیکھ لیا
بال روٹھے تو پھر نہیں لوٹے
ہم نے سب آزما کے دیکھ لیا
ٹنڈ کرائی کہ بال بڑھ جائیں
بال شاید پھر سر پہ چڑھ جائیں
ریچھ کا جھوٹا کھا کے دیکھ لیا
برگِ مہندی اور پیاز کا پانی
عَرَقِ لیموں، دھنیا میدانی
نسخہ ہر اک بنا کے دیکھ لیا
کچھ ہوا نہ جب اشک بہنے پہ
کھاد ڈالی کسی کے کہنے پہ
سر پہ ہل بھی چلا کے دیکھ لیا
ڈاکٹر، وید، حکیم، عطائی
کچھ نہ چھوڑے ہم نے اے بھائی
سب کو ٹکلا دکھا کے دیکھ لیا
گنج بڑھتا ہے روز و شب ایسے
بدلی سے چاند دکھائے چھب جیسے
وگ میں سر کو چھُپا کے دیکھ لیا