یاد جب آجائے گا اس کا پلٹ کر دیکھنا

یاد جب آجائے گا اس کا پلٹ کر دیکھنا
چلتے چلتے پاؤں ہو جائیں گے پتھر دیکھنا
‏
خود سمجھ جاؤ گے اس کی چاہتوں کا رخ ہے کیا
تم ہواؤں میں کبھی پتے اڑا کر دیکھنا
‏
تم کو آئے گی یقینا" میری بھی خوشبو کہیں
تم کبھی اوراق ماضی کے الٹ کر دیکھنا
‏
وہ جب آیا تو کھلے گا تم پہ مفہوم_ بہار
اس کا چہرا دیکھ لینا ہے گل_ تر دیکھنا
‏
منتظر بیٹھی ہوں ساحل پر میں پتھر کی طرح
میری جانب آئے گا اک دن سمندر دیکھنا
‏
‏رفتہ رفتہ میں نے سیکھا جگ میں جینے کا چلن
سب سے ہنس کر بولنا اور مسکرا کر دیکھنا
‏
اس قدر ارزاں نہیں یہ زندگی ، تم بھی صدف
پاؤں پھیلانے سے پہلے اپنی چادر دیکھنا