!!جهنوں دل وچ اساں وسایا اے

جہنوں دل وچ اساں وسایا اے
اوس نے ہی دل روایا اے

کدی پھلاں وانگ پرویا سی
جیس من میرا اج ڈھایا اے

وقت وقت دی گل ہوندی اے
کس نت دا ساتھ نبھایا اے

کھل جاوے نہ ہن بھید تیرا
سو تینوں نہ آزمایا اے

ویری وی ہن سنگی لگن
کجھ سنگتاں انج ستایا اے

کوئی کسے دا دردی نئیں
اے کہہ کے دکھ گھٹایا اے

اک اوہی اوہ اے نظراں وچ
ہاتھ جیس در تے پھیلایا اے

اک عشق دا درد کما کے عنبر
باقی تے سب گنوایا اے