رانجھن یار

رانجھا آکھدا ہیر دی والدہ نوں، تہاڈی بیٹی ہے بڑی خراب خالاں
کن کھچ کے رکھیا کرو اُسدے، تہانوں پادے ناں کسے عذاب خالاں

کالج جاندی اے سائیکلاں موٹراں تے، ڈیلی وّن سوّنیاں منڈیاں ناں
کدی لکھدی درختاں تے نام جا کے، لے کے جاندی اے نالے گلاب خالاں

ریہندی ٹشن مشن جیویں ہیڈ مسٹرس،ہر بندے تے پاندی اے رُعب ایویں
ایجوکیشن چ ذرا نئیں دھیان نالے، آندی اک نئیں ایہنوں کتاب خالاں

وِچ لسی دے پاندی اے گُڑ تھوڑا، دے جاندی اے چوری وی ڈالڈے دی
مجھاّں چون ویلے پٹھے پان ویلے،کرکے جاندی اے کم خراب خالاں

پائے کھل وڑیویں یا صرف پٹھے، دُدھ ویچیا اے کتھے کناں کناں؟
آنے آنے دا پچھ دی انج جیویں،وِچ قبر دے ہندا حساب خالاں

راتیں آندی نے پا تھرتھلی دتی، جاندی پمپ دا بٹن وی آن کر گئی
چاچے کیدو دی منجی دے ہیٹھ پانی، صبح انج سی جیویں سلاب خالاں

ٹی وی ،ڈیک تے کیبل نیں شوق ایہدے،کدی پڑھی نماز وی بھل کے نئیں
کدی عقل دی گل جے دس دیو،اگو دیندی اے گھڑواں جواب خالاں

جیکر اجے وی تُساں نہ دھیان کیتا، چن چڑھ جانا ایویں چودھویں دا
میرا فرض حقیقتاں دس دینا،میں آں نوکر تے تُساں جناب خالاں

چھڈی افسری دتا ریزائن دفتر، پچھے ہیر دے انج برباد ہو گئے
جوگ تن تے من دا روگ لے کے،کیتی مجھاں نہلان دی جاب خالاں

میں جی نیک شریف حسین وی آں، باراں سال توں تہاڈا کمین وی آں
میرے نال جے اوسدا ویاہ کر دؤ،تہانوں ہووے گا بڑا ثواب خالاں