کرم اے ساقیِ بطحا

کرم اے ساقیِ بطحا ﷺ
نہیں کونین میں تُم سا
تمنّا ہے پِیوں تم سے
میں جامِ کوثرِ اعلیٰ

تُمِہی وجہِ ثباتِ کُل
تُمِہی سے ہے نجاتِ کُل
تُمِہی ہو معجزاتِ کُل
رُخِ یوسف، دمِ عیسٰی

تُمِہی کَملی میں مزَّمِّل
اَلَم نَشرَح کا تم حاصل
تمِہی سے ہے سجی محفل
کہیں یَسِیں، کہیں طٰہٰ

تُمِہی ہو رحمتِ رحماں
تُمِہی ہو عظمتِ انساں
تُمِہی ہو خاص وہ مہماں
کہ تھے قَوسَین اَو اَدنٰی

تُمِہی ہادی، تُمِہی حاشر
تُمِہی ناہی، تُمِہی ناصر
تُمِہی اول، تُمِہی آخر
ولی تم ہو، تُمِہی مولٰی

صفی تم ہو، نبی تم ہو
پیمبر آخری تم ہو
رسولِ ہاشمی ﷺ تم ہو
چُنا تم کو، وَصَلَّی اللہ

کرم اے ساقیِ بطحا ﷺ
نہیں کونین میں تُم سا
تمنّا ہے پِیوں تم سے
میں جامِ کوثرِ اعلیٰ