Chahaten Mausami Parinde Hain Rut Badalte Hi Laut Jate Hain

Chahaten Mausami Parinde Hain Rut Badalte Hi Laut Jate Hain

ghonsle ban ke tuut jaate hain dagh shakhon pe chahchahate hain

aane vaale bayaz men apni jaane walon ke naam likhte hain

sab hi auron ke khali kamron ko apni apni tarah sajate hain

maut ik vahima hai nazron ka saath chhutta kahan hai apnon ka

jo zamin par nazar nahin aate chand taron men jagmagate hain

ye musavvir ajib hote hain aap apne habib hote hain

dusron ki shabahaten le kar apni tasvir hi banate hain

yun hi chalta hai karobar-e-jahan hai zaruri har ek cheez yahan

jin darakhton men phal nahin aate wo jalane ke kaam aate hain