Chal Aa Ek Aisi Nazam Kahoon

Chal Aa Ek Aisi Nazam Kahoon
Jo lafz kahoon wo ho jaye

Bus ashk kahoon to ik ansoo
Tere gorey gaal ko dho jaye

Main aa likhoon tu aa jaye
Main baith likhoon tu aa bethey

Mere shaaney par sar rakhey tu
Main neend kahoon tu so jaye

Main kaghaz par tere hont likhoon
Tere honton par muskaan aye

Main dil likhoon tu dil thamey
Main gum likhoon wo kho jaye

Tere hath banaoon pencil se
Phir hath pe tere hath rakhoon

Kuch ulta seedha farz karun
Kuch seedha ulta ho jaye

Main aah likhoon tu haye kare
Bechain likhoon bechain ho tu

Phir bechain ka 'be' katoon
Mujhe chain zara sa ho jaye

Abhi ain likhoon tu sochey mujhe
Phir sheen likhoon tere neend urey

Jab qaaf likhoon tujhe kuch kuch ho
Main ishq likhoon tujhe ho jaye