Faasley Door Utha Laye Hein Yaaron Se Mujhey..

Faasley Door Utha Laye Hein Yaaron Se Mujhey
Koi Awaaz Lagata Hein Kinaaron Se Mujhey

Ji Tarasta Hei Phir Us Teri Tawajja Ke Liye
Jo Alag Ho Ke Mila Karti Thi Saaron Se Mujhey

Wohi Namnaak Si Aankhen, Wohi Khiltey Huey Lab
Phir Teri Yaad Bulaati Hei Isharon Se Mujhey

Ain Mumkin Hei Koi Teiz Hawa Ka Jhonka
Le Urrey Aur Mila Dey Mere Pyaron Se Mujhe

Haaye, Tanhaayi Ka Ehsaas Ke Jaata Hi Nahin
Haan Sukoon Milta Hei Kuch Dard Ke Maaron Se Mujhey

Kat'ti Hei Jab Meri Raaten Unhein Gin Gin Ker,
Kyun Na Phir Ishq Ho Chaand Sitaaron Se Mujhey