Kon Jeeta Hai

Aah Ko Chaahiye Ik Umr Asar Hone Tak
Kaun Jiitaa Hai Terii Zulf Ke Sar Hone Tak

Daam Har Mauj Mein Hai Halqaa-E-Sad_Kaam-E-Nahang
Dekhein Kyaa Guzare Hai Qatare Pe Gauhar Hone Tak

Aashiqii Sabr-Talab Aur Tamannaa Betaab
Dil Kaa Kyaa Rang Karun Khuun-E-Jigar Hone Tak

Ham Ne Maanaa Ke Tagaaful Na Karoge Lekin
Khaak Ho Jaayeinge Ham Tum Ko Khabar Hone Tak

Partav-E-Khuur Se Hai Shabanam Ko Fanaa Kii Taaliim
Main Bhii Huun Ek Inaayat Kii Nazar Hone Tak

Yak_Nazar Besh Nahiin Fursat-E-Hastii Gaafil
Garmii-E-Bazm Hai Ik Raqs-E-Sharar Hone Tak

Gam-E-Hastii Kaa ‘Asad’ Kis Se Ho Juz Marg Ilaaj
Shammaa Har Rang Mein Jalatii Hai Sahar Hone Tak