Main Sach Kahun Pas-e-deewar Jhut Bolte Hain

main sach kahun pas-e-diwar jhut bolte hain

mere khilaf mere yar jhut bolte hain

mili hai jab se unhen bolne ki aazadi

tamam shahr ke akhbar jhut bolte hain

main mar chuka hun mujhe kyun yaqin nahin aata

to kya ye mere aza-dar jhut bolte hain

ye shahr-e-ishq bahut jald ujarne wala hai

dukan-dar o kharidar jhut bolte hain

bata rahi hai ye taqrib-e-mimbar-o-mehrab

ki muttaqi o riya-kar jhut bolte hain

qadam qadam pe nai dastan sunate log

qadam qadam pe kai bar jhut bolte hain

main sochta hun ki dam len to main unhen tokun

magar ye log lagatar jhut bolte hain

hamare shahr mein 'aami' munafiqat hai bahut

makin kya dar-o-diwar jhut bolte hain