Milna Tha Ittefaq Bicharna Naseeb Tha

Milna Tha Ittefaq Bicharna Naseeb Tha
wo utni dur ho gaya jitna qareeb tha

main us ko dekhne ko tarasti hi rah gai
jis shakhs ki hatheli pe mera naseeb tha

basti ke sare log hi aatish-parast the
ghar jal raha tha aur samundar qareeb tha

mariyam kahan talash kare apne KHun ko
har shakhs ke gale mein nishan-e-salib tha

dafna diya gaya mujhe chandi ki qabr mein
main jis ko chahti thi wo larka ghareeb tha