Tasadum

Kyun Dar Hai Mujh Ko Tujh Se Gar Hai Tu Apne Haq Par
Kyun Bhaagta Hu Tujhse Gar Hai Tu Apne Maqsad Par
Kyun Khawahish Nahin Hai Teri Gar Hai Tu ‘Dar-E-Jannat’
Mein Jaanta Hu Khud Ko Tayyari Nahin Hai Ab Tak

Kyun Hu Ghair Intezari Gar Hai Tu Apne Waqt Par
Kyun Maqdam Nahin Tu Mujh Ko Gar Hai Tu Mere Darr Par
Kyun Maanta Nahin Mein Tu Hai Haqeeqee Mantaq
Mein Jaanta Hu Khud Ko Tayyari Nahin Hai Ab Tak

Kyun Chah Nahin Hai Teri Gar Tu Hul-E-La’elaji
Kyun Shar Hai Mujh Ko Tujhse Gar Hai Tu Kul Khulaasi
Kyun Chal Pada Hu Tujh Tak Jism Rok Pau Kab Tak
Mein Jaanta Hu Khud Ko Tayyari Nahin Hai Ab Tak

Tu Theher Kyn Na Jaati Kuch Pal De Kyn Na Paati
E Mout Kya Pata Hai Tu Sirf Hukm Bijlati
Tere Shaoor Me Na Hai Azaad Ruh Yeh Kab Tak
Shikwa Hai Apni Ruh Se Tayyari Nahin Ki Ab Tak

Shaitaan Si Jahulat Karta Rhu Mein Ujlat
Hasad Hai Mere Dil Me Alfaazon Me Teri Gheebat
Gaya Mera Farishta Lauta Nahin Kyn Ab Tak
Samjha Nahin Hu Phr Bhi Chhoti Si Meri Muddat

Padhta Hu Roz Kalma Deta Hu Me Shahadat
Dil Me Pata Hai Matlab Bas Aati Nahin Aqeedat
Mera Toh Yeh Aqeedah Doulat Hi Meri Izzat
Mein Jaanta Hu Khud Ko Tayyari Nahin Hai Ab Tak

Meri Jo Hain Namazein Tikti Nahin Nigahein
Mere Dil Ko Yeh Pata Hai Mujhe Na Yeh Jala Dein
Sajde Kiya Hu Jis Par Aansu Nahin Hai Ab Tak
Mein Jaanta Hu Khud Ko Tayyari Nahin Hai Ab Tak

Kya Hai Kalaam Ilaahi Mene Abhi Na Jaana
Padhta Hu Hirse Barkat Hidayat Usey Na Maana
Zubaan Hai Na Arbi Dil Me Nahin Hai Dastak
Mein Jaanta Hu Khud Ko Tayyari Nahin Hai Ab Tak

Zikr Ka Mein Kya Batau Zaba Pe Hai Toh Harkat
Alfaaz Bun Rha Hu Daulat Ki Sirf Hai Hasrat
Mujhe Nahin Pata Yeh Kya Hai Woh Qurb O Lazzat
Mein Jaanta Hu Khud Ko Tayyari Nahin Hai Ab Tak

Roze Na Mujhse Poocho Karta Hu Itni Zehmat
Bhook Pyaas Toh Nahin Hai Par Karta Hu Poori Hujjat
Mjh Me Sabr Nahin Hai Bas Jabar Si Yeh Aadat
Mein Jaanta Hu Khud Ko Tayyari Nahin Hai Ab Tak

Daulat Ka Kya Batau Karta Hu Itni Mehnat
Kaise Isey Bahau Mein Aashiq Hu Yeh Mohabbat
Zakaat Kya Hai Masla Hisaab Na Hai Ab Tak
Mein Jaanta Hu Khud Ko Tayyari Nahin Hai Ab Tak

Meri Ruh Ki Hai Hasrat Ghumu Phiru Har Sarhad
Samjhu Kya Hai Nabuwwat Seekhu Kya Hai Yeh Daawat
Mujhe Koi Chala De Dila De Thodi Himmat
Mein Jaanta Hu Khud Ko Tayyari Nahin Hai Ab Tak

Taubah Toh Me Karu Yu Ke Poori Ho Meri Mannat
Shikwa Hai Door Karna Maafi Nahin Hai Hasrat
Mere Gunah Ka Parbat Girta Nahin Yeh Kab Tak
Mein Jaanta Hu Khud Ko Tayyari Nahin Hai Ab Tak

Paida Hua Tha Be Gharz Bachpan Jiya Hu Bebas
Dil Toh Abhi Laga Hai Na Samjhu Kya Hai Aqdas
Banaata Rahu Yeh Heele Yeh Sochta Hu Kab Tak
Mein Jaanta Hu Khud Ko Tayyari Nahin Hai Ab Tak

Ek Baat Tu Bata De Kar De Ehsan Mujh Par
Mere Dil Ki Yeh Jo Harkat Band Hogi Kis Rukh Par
Tujh Ko Na Yeh Pata Hai Mein Chahta Hu Jannat
Par Jaanta Hu Khud Ko Tayyari Nahin Ki Ab Tak

Socha Tha Kuch Toh Likh Du Ban Jaaye Woh Hurf E Ibrat
Likha Hai Yeh Jo Shikwa Na Kaam Sa Yeh Khush Khat
Yasir Tujhe Pata Hai Tu Chahta Hai Shohrat
Tu Jaanta Hai Sab Kuch Toh Tayyari Nahin Kyn Ab Tak