Ulfat Ko Bujha Dete Hain Alfaaz Ke Nashtar

Ulfat Ko Bujha Dete Hain Alfaaz Ke Nashtar
Nafrat Ko Hwa Dete Hain Alfaaz Ke Nashtar

Jannat Ki Terhan Hota Hai Ghar Waisay To Lekin
Dozakh Sa Bana Dete Hain Alfaaz Ke Nashtar

Jazbaat Ke Naatey Hon Ya Phir Khoon Ke Rishte
Qurbat Ko Mita Dete Hain Alfaaz Ke Nashtar

Insaan To Insaan Hain Murjhayeen Nah Kaisay
Pairron Ko Sikha Dete Hain Alfaaz Ke Nashtar

Woh Zakham Nahi Lagtay Kabhi Tegh O Sinaan Se
Jo Zakham Laga Dete Hain Alfaaz Ke Nashtar

Hathyaaron Se Woh Hashar Bapaa Hota Nahi Hai
Jo Hashar Macha Dete Hain Alfaaz Ke Nashtar

Tahazeeb O Saqafat Mein Tafawut Nah Ho Chahay
Seemayin Bana Dete Hain Alfaaz Ke Nashtar

Ho Jati Hain Phir Raakh Kayi Naslen Dehak Kar
Jab Aag Laga Dete Hain Alfaaz Ke Nashtar

Baste Hue Shehron Ko Mein Ne Dekha Hai Deepuk
Shamshaan Bana Dete Hain Alfaaz Ke Nashtar