Wo Jo Hum Mein Tum Mein Qarar Tha Tumhein Yaad Ho Ki Na Yaad Ho

Vo Jo Ham Men Tum Men Qarar Tha Tumhen Yaad Ho Ki Na Yaad Ho
Vahi Ya.Ani Va.Ada Nibah Ka Tumhen Yaad Ho Ki Na Yaad Ho

Vo Jo Lutf Mujh Pe The Beshtar Vo Karam Ki Tha Mire Haal Par
Mujhe Sab Hai Yaad Zara Zara Tumhen Yaad Ho Ki Na Yaad Ho

Vo Na.E Gile Vo Shikayaten Vo Maze Maze Ki Hikayaten
Vo Har Ek Baat Pe Ruthna Tumhen Yaad Ho Ki Na Yaad Ho

Kabhi Baithe Sab Men Jo Ru-Ba-Ru To Isharaton Hi Se Guftugu
Vo Bayan Shauq Ka Barmala Tumhen Yaad Ho Ki Na Yaad Ho

Hue Ittifaq Se Gar Baham To Vafa Jatane Ko Dam-Ba-Dam
Gila-E-Malamat-E-Aqriba Tumhen Yaad Ho Ki Na Yaad Ho

Koi Baat Aisi Agar Hui Ki Tumhare Ji Ko Buri Lagi
To Bayan Se Pahle Hi Bhulna Tumhen Yaad Ho Ki Na Yaad Ho

Kabhi Ham Men Tum Men Bhi Chaah Thi Kabhi Ham Se Tum Se Bhi Raah Thi
Kabhi Ham Bhi Tum Bhi The Ashna Tumhen Yaad Ho Ki Na Yaad Ho

Suno Zikr Hai Ka.I Saal Ka Ki Kiya Ik Aap Ne Va.Ada Tha
So Nibahane Ka To Zikr Kya Tumhen Yaad Ho Ki Na Yaad Ho

Kaha Main Ne Baat Vo Kothe Ki Mire Dil Se Saaf Utar Ga.I
To Kaha Ki Jaane Miri Bala Tumhen Yaad Ho Ki Na Yaad Ho

Vo BigaḌna Vasl Ki Raat Ka Vo Na Manna Kisi Baat Ka
Vo Nahin Nahin Ki Har Aan Ada Tumhen Yaad Ho Ki Na Yaad Ho

Jise Aap Ginte The Ashna Jise Aap Kahte The Ba-Vafa
Main Vahi Huun 'Momin'-E-Mubtala Tumhen Yaad Ho Ki Na Yaad Ho