Woh Muflison Ka Maal Urra Kar Chalay Gaye

Woh Muflison Ka Maal Urra Kar Chalay Gaye
Saaray Jahan Ki Zillat Utha Kar Chalay Gaye

Ab Un Ki Saat Peerrhiyaan Khayen Gi Baith Kar
Jitne Asasay Apne Bana Kar Chalay Gaye

Pehlay Hi Sood Bharnay Ko Dhaila Nahi Tha Aik
Oopar Se Aur Qarzay Charha Kar Chalay Gaye

Jaisay Hi Iqtidaar Gaya Un Ke Haath Se
Bimarion Ke Heelay Bana Kar Chalay Gaye

Putlaay Bana Kar Un Ke Jalaya Kare Gi Qoum
Jo Takhat Pay Lutairay Bitha Kar Chalay Gaye

Insaaf Naam Ki Jahan Koi Cheez Hi Nahi
Andhi Nagar Woh Aisi Bana Kar Chalay Gaye

Firaon Ke Woh Ant Se Shayad Thay Be Khabar
Firavniyat Jo Apni Dikha Kar Chalay Gaye