آ مل اجکل سوہناں سائیں

آ مل اجکل سوہناں سائیں ۔نہ تاں مفتی خون تھیسائیں ۔

توں بن مول ن سہندیاں واہیں ۔سن دل نال تاں گالھ اکھائیں ۔

پربھت دھاراں روہ گھنیڑے ۔جتھ لانگھے جتھ تھیوم وہیرے ۔

بے شک دردمنداں دے دیرے ۔جتھ تھلڑا جتھ سنجڑیاں جانہیں ۔

ہک پل عیش ن پائم گھر وچّ ۔گزری ساری عمر سفر وچّ ۔

پوندے سو سو پور اندر وچّ ۔یاربّ یار دے دیس وسائیں ۔

جاں ڈیکھاں جھڑّ مینہہ کن من کوں ۔روواں کر کر یاد سجن کوں ۔

اکھیاں بلکن منہ ڈیکھن کوں ۔گل لانون کوں تھپکن باہیں ۔

واٹ نہاراں کانگ اڈاراں ۔پنڈت جوسی دے کن کھاواں ۔

سو پنج ہاراں فالاں پاواں ۔اؤسی میڈا یار کڈاہیں ۔

میں بدناں کہیں بھیم بھرم دا ۔تونہی صاحب لاج شرم دا ۔

زور فرید کوں تیڈڑے دم دا ۔لگڑی ساول توڑ نبھائیں ۔