آتشِ عشقِ محمدؐ سے جلا دے مجھ کو
Poet: Azra Naz By: Azra Naz, Reading UKآتشِ عشقِ محمدؐ سے جلا دے مجھ کو
یا خدا خاک سے اکسیر بنا دے مجھ کو
بحرِ عصیاں سے بچوں کیسے بتا دے مجھ کو
خوابِ غفلت سےمرے آقا جگا دے مجھ کو
آدمیت کا قرینہ نہیں آیا اب تک
آدمیت کا قرینہ تو سکھا دے مجھ کو
میرا ہر ایک قدم راہ میں تیرے اٹھے
تیری خوشنودی ملے ایسی ادا دے مجھ کو
فہم و ادراک سے آقاؑ میرا دامن بھر دے
رُوح بیمار نہ ہو ایسی شفا دے مجھ کو
دل کی اجڑی ہوئی بستی میں بہار آجائے
یہ تمنا ہے مدینے کی ہوا دے مجھ کو
لب پہ ہو اِسمِ محمدؑ دمِ آخر عذراؔ
ہر گھڑی ایسی ہی توفیقِ ثناء دے مجھ کو
Rate it: 
Views: 447
16 Apr, 2013
More Religious Poetry
