آپے بار محبت چائم ڑی

آپے بار محبت چائم ڑی ۔ونج آپ کوں آپ اوائم ڑی ۔

سب ڈکھاں سولاں دی تات ملم ۔غم درد، اندوہ، برات ملم ۔

بھیڑے ڈکھڑیں مار منجھائم ڑی ۔

سوہنا ہوت پنل چھڈّ کیچ گیا ۔گل سوز فراق دا پیچ پیا ۔

جو لکھیا پلڑے پائم ڑی ۔

ڈکھاں تھل مارو آ پیش گیا ۔دل جان جگر تن ریش گیا ۔

تتی عشقَ اولڑا لائم ۔

منہجا یار پنل چھڈّ کیچ رٹھا ۔سر جلمیں نینہ جو میہہ وٹھا ۔

ربّ ایڑھے بار سہائم ڑی ۔

ہک وار فرید نوں یار ملے ۔سرو پنڈ ہجر دا بار ٹلے ۔

جیندے کارن امر گنوائم ڑی ۔