امیراں

توں کُڑی امیراں دی، ابا ترا اے سیاست دان
میں واں مُنڈا غریباں دا ،ابا مرا اے غریب کسان

تری ڈفنس وچ کوٹھی،پورے چار کنالاں اُتے
ساڈا کچی آبادی دے وچ،دو منجیاں دا مکان

تُوں کھاوے روز ہوٹل وچ ، مکڈولنڈ تے پیزا
اسی وڈے ہو گئے آں،کھا کے چھُولے تے نان

تُوں جاوے کلباں وچ، پا کے ادھے لیڑے
اسی نچ لیندے میلایاں وچ،پا کے کچھا ،بنیان

تُوں پھریں ٹھنڈی گڈی وچ،انار کلی تے پینوراما
ساڈی ٹوٹی سائیکل اوتے،لنڈے تک اوڑان

تاڈے وچ بے حیائی،فیشن بن کے ہے آئی
ساڈی تے کُڑی ویکھ کے، نکل جاندی اے جان

تُوں کیتیاںپڑھایاں جا کے ،امریکہ تے جاپان
اسی ٹاٹاں تے پڑھ کے، سنبھالی دادے دی دکان

کھیڈاں اسی کھیڈیاں، گلیاں وچ کھا کے چھتر
تاڈے واسطے حاضر سن، وڈے وڈے میدان

دے کے ڈونیشن ،تیاڈی کالج وچ پکیاں سیٹاں
ساڈی واری شروع ہو جائے، میرٹ دی گردان

تاڈے بچے نہ پڑھ کے ،فوج وچ کرنل،جرنل
ساڈے بچے محنتاں کر کے ،چپڑاسی تے دربان

تیاڈے ویاواں وچ ،درجن ڈشاں تے شراب
سانوں لا کے ون ڈش پابندی،کیتا جے پریشان

آپوں قرضے لے کے،آپوں کر دیندے معاف
بندا ایناں نوں پُوچھے،تاڈے پیو دا اے پاکستان

چل طاہر چُپ کر جا ،ایتھے کسی نے تر ی نہیں سننی
وادوں کھپ پائی تے، تھانے وچ تُوں مہمان