اپنی تدبیر نہ تقدیر پہ رونا آیا

اپنی تدبیر نہ تقدیر پہ رونا آیا
دیکھ کر چپ تری تصویر پہ رونا آیا

کیا حسیں خواب محبت نے دکھائے تھے ہمیں
جب کھلی آنکھ تو تعبیر پہ رونا آیا

اشک بھر آئے جو دنیا نے ستم دل پہ کئے
اپنی لٹتی ہوئی جاگیر پہ رونا آیا

خون دل سے جو لکھا تھا وہ مٹا اشکوں سے
اپنے ہی نامے کی تحریر پہ رونا آیا

جب تلک قید تھے تقدیر پہ ہم روتے تھے
آج ٹوٹی ہوئی زنجیر پہ رونا آیا

راہ ہستی پہ چلا موت کی منزل پہ ملا
ہم کو اس راہ کے رہ گیر پہ رونا آیا

جو نشانے پہ لگا اور نہ پلٹ کر آیا
ہم کو نوشادؔ اسی تیر پہ رونا آیا