Add Poetry

اچھا جو خفا ہم سے ہو تم اے صنم اچھا

Poet: انشاء اللہ خان انشا By: Tooba, Hyderabad
Acha Jo Khafa Hum Se Ho Tum Ae Sanam Acha

اچھا جو خفا ہم سے ہو تم اے صنم اچھا

لو ہم بھی نہ بولیں گے خدا کی قسم اچھا

مشغول کیا چاہئے اس دل کو کسی طور

لے لیویں گے ڈھونڈ اور کوئی یار ہم اچھا

گرمی نے کچھ آگ اور بھی سینہ میں لگائی

ہر طور غرض آپ سے ملنا ہی کم اچھا

اغیار سے کرتے ہو مرے سامنے باتیں

مجھ پر یہ لگے کرنے نیا تم ستم اچھا

ہم معتکف خلوت بت خانہ ہیں اے شیخ

جاتا ہے تو جا تو پئے طوف حرم اچھا

جو شخص مقیم رہ دل دار ہیں زاہد

فردوس لگے ان کو نہ باغ ارم اچھا

کہہ کر گئے آتا ہوں کوئی دم کو ابھی میں

پھر دے چلے کل کی سی طرح مجھ کو دم اچھا

اس ہستئ موہوم سے میں تنگ ہوں انشاؔ

واللہ کہ اس سے بہ مراتب عدم اچھا

Rate it:
Views: 913
01 Feb, 2021
More Insha Allah Khan Poetry
بھلے آدمی کہیں باز آ ارے اس پری کے سہاگ سے بھلے آدمی کہیں باز آ ارے اس پری کے سہاگ سے
کہ بنا ہوا ہو جو خاک سے اسے کیا مناسبت آگ سے
بہت اپنی تاک بلند تھی کوئی بیس گز کی کمند تھی
پر اچھال پھاندا وہ بند تھی ترے چوکیداروں کی جاگ سے
بہت آئے مہرے کڑے کڑے وہ جو منڈ جی تھے بڑے بڑے
ولے ایسے تو نہ نظر پڑے کہ جو صاف پاک ہوں لاگ سے
وہ سیاہ بخت جو رات کو ترے دام زلف میں پھنس گیا
اسے آ کے وہم و خیال کے لگے ڈسنے سیکڑوں ناگ سے
بھرا میں نے بندرابن میں جو ارے کشن ہوپ کا نعرہ تو
مہاراج ناچتے کودتے چلے آئے لٹ پٹی پاگ سے
لگے کہنے کھیم کُسل اسے جو علیؔ کے دھیان کے بیچ ہے
تورے دکھ دلدر جتی تھے گئے بھاگ آپ کے بھاگ سے
ہوئے عاشق ان کے ہیں مرد و زن یہ انوکھی ان کی بھی کچھ نہیں
کوئی تازہ آئے ہیں برہمن یہ جو کاشی اور پراگ سے
تجھے چاہتے نہیں ہم ہیں بس انہوں کو بھی تو تری ہوس
وہ جو بھکڑے بیر سے سو برس کے پرانے بوڑھے ہیں داگ سے
اے لو آئے آئے سوائے کچھ نہیں بات دھیان میں چڑھتی کچھ
کچھ اک ان فقیروں کی مجلسیں بھی تو ملتی جلتی ہیں بھاگ سے
مجھے کام ان کے جمال سے نہ تو ٹپّے سے نہ خیال سے
نہ تو وجد سے نہ تو حال سے نہ تو ناچ سے نہ تو راگ سے
یہ سعادت اس کو علیؔ نے دی جو وزیر اعظم ہند ہے
کہ بدولت اس کی جہان میں نہیں خوف بکری کو باگ سے
مجھے رحم آتا ہے ایسوں پر بسر اپنے کرتے ہیں وقت جو
کسی پھل سے یا کسی پھول سے کسی پات سے کسی ساگ سے
گتھی ان سروں ہی میں آ گئی مجھے اک عروس کے باس سے
ابھی انشاؔ اپنا ہو بس اگر تو لپٹ ہی جاؤں بہاگ سے
Umer
Popular Poetries
View More Poetries
Famous Poets
View More Poets