ایمر جنسی وارڈ

ایمر جنسی وارڈ وچ رب کسے نوں ناں لے جاوے
مردے پئے مریض دا ڈاکٹر مل مکاوے

کیہو جیہا چاہی دا ہے میڈیکل تھوآنوں
پیسے بھرنے پین گے منگدا اوہ زبانوں

ادھموئے مندے دے وارث منتاں ترلے کردے
اوہدی جان بچان دے منہ منگے پیسے بھردے

معائنہ کر کے ڈاکٹر نے جو لکھیاں دوائیاں
کی دساں میں اس تو اگے ہتھ آ گیا قصائیاں

کمپوڈر نے جان کے مینوں اوسے تھاں توں پھڑیا
جتھوں میرے پنڈے دا بوہتا ماس سی سڑیا

تازہ سرخی لا کے اتوں اک آ گئی نرس
ٹیکا لان لگیاں نہ ذرا وی آیا ترس

میریاں چیکاں سن کے میرے وارث دوڑ کے آئے
کی ہویا اے تینوں کیوں کرناں ایں ہائے ہائے

میں کیا ایتھوں کڈھ لو مینوں یا اینا نوں سمجھاؤ
نقدی کجھ لائی تے نالے پوائی چاہ

فیر تے میری یارو ہو گئی واہ واہ
بڑے پیار دے نال کمپوڈر میرے کول آیا
روئی دے پھنبے نال پکڑ کے میرا پیر ہلایا

نرس نے نرم نرم ہتھاں نال سوئی پھر چبھوئی
جس دی پیڑ یارو مینوں زرا وی نہ ہوئی