بلاں دی کہانی

ہیرے دے ہوٹل ول جان ساں میں لگا
کم توں آیا روٹی کھان ساں میں لگا
سارا دن میں کم کاج چہ لنگھایا
سویر دی سی کھادی ٹڈھے پان ساں میں لگا

ایہنے وچ ڈاکئے نے واج اک لائی
ارانہہ آ گامے تیرے ناویں ڈاک آئی
بچے ماں نال رہن نانکے سی گئے
میں سمجھیا اوہناں خبر خیر دی گھلائی

نٹھ کے میں ڈاکئے دے کول جا کھلوتا
کہیا اوہنوں چھیتی دے تے ٹائم لا نہ بوہتا
کہندا مینوں گامیا نہ بن بوہتا کاہلا
ہر کم اپنے ہے ٹائم پر ہوتا

کی دساں کیناں میں چاہ چڑھ گیا
ڈاک لیندیاں ہویاں مینوں ساہ چڑھ گیا
پھڑی ڈاک جدوں دل پاٹ گیا جیویں

بل تن اکٹھے ویکھ کے تے تاہ چڑھ گیا
اُنی سو روپئے بل گیس دا سی آیا
تیرہ سو روپئے پانی والیاں نے پایا
پوری تنخواہ میری بنھے لگ گئی
چودہ ہزار روپئے بتی والیاں ٹھکایا

اگلے دیہاڑ بل تارن لئی میں چلا
چابی گوانڈھیاں نوں دے کے تے گھر چھڈ کلا
کیہڑے بینک وچ تارنے نے بل میں تینے
میرا وڈا منڈا جاندا یا جاندا سی اللہ

ڈھائی تن سو کھڑے سی گبھرائے کملائے
سینمے دے باہر بندے لین بنائے
میں پوچھیا کہ پاجی کیہڑی فلم دی اے بکنگ
کہن لگا رب تینوں دن اے ویکھائے

اک کیہندا غریباں دے دل اتے سیخ اے
دوجا کیہندا سن میری چیخ وچ چیخ اے
تیجا کیہندا بینک اے کوئی سینما گھر نہیں
الو دیا پٹھیا اج بل دی تاریخ اے

اے نہیں پتہ مینوں میری واری کد آئی
بس ایہناں پتہ مینوں میری واری جد آئی
لین چہ کھلوتے ہویاں وال چیٹے ہو گئے
میرے چھلے والے منڈے دی سی شیو ودھ آئی

اڈیک اڈیک رو رو مینوں نمانی
دوجا بندہ کر لیا میری سوانی
میرے بچے مینوں آکھدے جے انکل
تے ایہہ سی جناب میری بلاں دی کہانی