جو بھی کریگا دل سے اطاعت حضور کی

جو بھی کریگا دل سے اطاعت حضور کی
محشر میں پایگا وہ شفاعت حضور کی

دنیا میں کامران ہے عقبہ میں کامیاب
اپنا لے زندگی میں جو سیرت حضور کی

چہرے پہ اُس کے نور الگ آتا ہے نظر
جس دل میں بس گئی ہو محبت حضور کی

بخشا خدا نے ان کو مقام صحابیت
پائی ہے جس کسی نے بھی صحبت حضور کی

یوں تو ہے اُسکا نام مسلمان، ہاں مگر
مومن وہی جو کرلے اطاعت حضور کی

ہوتا ہے ذکر عرش پر ایسے مکان کا
ہوتی ہے جس مکان میں مدحت حضور کی

اتنا کرم تو فیض پہ کر دے میرے خدا
ہوجائے اس کو خواب میں زیارت حضور کی