حمد باری تعالی

مالکِ ارض وسما تو
صاحبِ جود سخا تو

ہادی تو جن وبشر کا
منبعِ رشد وہدیٰ تو

سب ترے در کے سوالی
مامنِ شاہ وگدا تو

حمد ومدح وشرف تیرا
لائقِ فضل وثنا تو

روز وشب کا ہے مقلّب
موجدِ صبح ومسا تو

منزلِ ’’والشمس‘‘ تو ہے
ناشرِ نور وضیا تو

روشنی ہی روشنی ہے
معدنِ حسن وسَنا تو

اَدون واَدنیٰ خلائق
پیکرِ مجد وعلا تو

ہے نہاں "لا فرق" میں یہ
خالقِ سرخ وسیَہ تو

حکم ہے "خذ ما صفا" کا
مرجعِ صدق وصفا تو

لفظِ "اَلَّف" میں ہےپنہاں
مصدرِ مہر ووفا تو

اوس وخزرج بھی ملے تھے
مخزنِ ربط واِخا تو

حکمِ "لا تحزن" تھا اعلاں
رہبرِ ثور وحرا تو

سوچ سے عاری ہے ہر دل
واہبِ فکر وادا تو

بھوکے مرتے ہیں بہت، پَر
فالقِ حب ونویٰ تو؟!

ہر جگہ آہ وفغاں ہے
کاشفِ کرب وبلا تو؟

حمد سامیؔ کی تو سن لے
سامعِ صوت وندا تو

یاسین سامی یوگوی۔ کویت

بروز شنبہ، ۱۳ رمضان المبارک ۱۴۳۶ھ، بموافق ۱۲ جولائی ۲۰۱۴؁ء،
بوقت ۶:۴۰ بصبح، بمقام غریب خانہ خود