دلِ شکستہ کو اپنا محل بناتی ہے

جو بوئے قربِ خدا صحنِ دل میں آتی ہے
تو ایک مستی میرے قلب و جاں پہ چھاتی ہے

زمانے بھر کو بھلا دوں تیری محبت میں
یہ آگ وہ ہے جو ہر ما سوا جلاتی ہے

جو ذات وسعتِ افلاک میں سما نہ سکی
دلِ شکستہ کو اپنا محل بناتی ہے

ہے تیرے قرب کی لذت ورائے لفظ و بیاں
سوائے دل کے یہ کس کو سمجھ میں آتی ہے

تمھارا ذکر میری زیست کا سہارا ہے
تمھاری یاد مجھے اشکِ خوں رُلاتی ہے

گمانِ اہلِ خرد میں بھی آ نہیں سکتی
زبانِ اہلِ جنوں راز وہ بتاتی ہے