دونوں جہاں میں مطلعِ انوار آپﷺ ہیں

اس باغ زندگانی کی مہکار آپﷺ ہیں
دلبر ہیں آپﷺ حسن کا شہکار آپﷺ ہیں

دیکھا جو عرش سے تو فرشتوں نے یہ کہا
دنیا میں ایک صاحبِ کردار آپﷺ ہیں

شمس و قمر ، ستارے ،بھی روشن ہیں آپﷺ سے
"اس تیرگی میں مطلعِ انوار آپﷺ ہیں"

گلشن میں پھول ، پھولوں میں خوشبو ہے آپﷺ سے
اس زندگی کے دشت میں گلزار آپﷺ ہیں

مدت سے اپنے درد کے مارے ہوئے ہیں ہم
خوش بخت ہیں کہ اپنے بھی غم خوار آپﷺ ہیں

اللہ کی مہربانی سے ہم سب کو ہے غرور
سارے جہاں میں نبیوں کے سردار آپ ﷺہیں

سب کچھ لٹا دیں آپ کے قدموں کی دھول پر
ہم امتی ہیں آپ ﷺکے ، سرکار آپﷺ ہیں

ہم کو دیا ہے آپ نے دنیا میں اک مقام
ہم دین کے سپاہی ہیں ،سالار آپﷺ ہیں

وشمہ نبیﷺ کی یاد سے ملتی ہے روشنی
دونوں جہاں میں مطلعِ انوار آپﷺ ہیں