سرورؐ زمانے کے وہ، احمدؐہے نام اُن کا

سرورؐ زمانے کے وہ، احمدؐہے نام اُن کا
رحمتؐ ہیں وہ مجسم ، بخشش ہے کام ان کا

وہ ساقئیؐ حشر ہیں، سب ان کے ہیں دیوانے
ان کی نگاہیں کوثر، تسنیم جام ان کا

عرشِ معلیٰ نیچے ان کے قدم کے آیا
اس تک فکر نہ پہنچے، اونچا مقام ان کا

وہ پیکرِ کلامِ ربِ کریم ہیں جو
رب نے کہا ہے میرا ، ہر اک کلام ان کا

محبوبؐ وہ خدا کے ، ہر جا ہے ان کی شاہی
رب کی صلوۃ ان پر، ہر اک سلام ان کا

کوئی نہ جان پائے ان کی رسائی کتنی
سلطانِ بحر و بر ہے جو ہے غلام ان کا

ان کی نظر مسیحا، زخمی دلوں کا مرہم
منشورِ آدمیت ہر اک پیام ان کا

بن جاؤ مرتضائیؔ ان کی گلی کے منگتے
ہاں! خیر بھی ملے گی، ہو گا قیام ان کا