غم گسارِ دل

ذکرِ مصطفیٰ کرکے لوٹ لو بہارِ دل
نعتِ مصطفیٰ سے ہے دوستو! قرارِ دل

وِردِ نامِ آقا سے قسمتیں سنورتی ہیں
باعثِ سکونِ دل اور ہے بہارِ دل

دل پہ وہ قدم رکھ دیں طالبِ کفِ پا ہوں
نقشِ پا بنے یہ دل ، دور ہو غبارِ دل

یامحمدِ عرَبی ، نورِ پاک اپنے
ظلمتوں کو دن کردیں ، دور ہو غبارِ دل

آپ سے سکونِ دل ، آپ بے کلوں کے کل
آپ بالیقیں آقا ، میرے غمگسارِ دل

نزع چین بخشے گا ، موت زندگی دے گی
آئیں گے اگر آقا ، وقت احتضارِ دل

نعت لکھنا کیا مشکل تجھ کو اے مُشاہدؔ سُن
احمدِ رضا جب ہیں تیرے راز دارِ دل