مثالی

محبت شرافت طریقت مثالی
شہہ دیں کی ہر اک ہے خصلت مثالی

بشر ان سے کیا کر سکے گا محبت
خدا کی ہے ان سے محبت مثالی

ہوا چاند جن کے اشارے سے دونیم
سبھی نے یہ دیکھی کرامت مثالی

نہ ہو خوشنصیبی سے کیوں میرا رشتہ
ملی ہے مجھے ان کی نسبت مثالی

جنہوں نے گداؤں کو بخشی ہے شاہی
ہے ایسی ہی ان کی سخاوت مثالی

تھے دشمن بھی ان کی صداقت کے قائل
ہے صادق امیں کی صداقت مثالی

دعا دشمنوں کی لیئے رب سے مانگی
محمد کی ہے یہ بھی عادت مثالی

فضل ہے ہمارے نبی کا جہاں پر
حسن ہے نبی کی فضیلت مثالی