مجھ کو میرا حوصلہ بھی آزمانے دیجئے

مجھ کو میرا حوصلہ بھی آزمانے دیجئے
یاد آتا ہے بہت ، اس کو بھلانے دیجئے
‏
دکھ نہیں گر اس عمل سے آپ کو خوشیاں ملیں
ٹوٹتا ہے دل جو میرا ، ٹوٹ جانے دیجئے
‏
یہ چمن میں چار سو اٹھکیلیاں کرتی ہوا
جس قدر بھی گل کھلاتی ہے ، کھلانے دیجئے
‏
لمحہ لمحہ زندگی میں ساتھ ہوگا وہ مرے
سرخ پھولوں سے مجھے رستہ سجانے دیجئے
‏
یاد کا کیا ہے کسی دن دے گی اس کو دستکیں
وہ مجھے بھولا ہوا ہے ، بھول جانے دیجئے
‏
‏کون سی دنیا ہے وہ ، ہم پھر سے مل پائیں جہاں
کچھ حقیقت کھولیے اور کچھ فسانے دیجئے
‏
ایک ہی تو شخص میری زندگی ہے اے صدف
ساری دنیا چھوڑ کر اس کو منانے دیجئے