مدحتِ صدیق

بیان کیسے کرے کوئی مدحتِ صدیق
خدا نے خود ہی بڑھائی ہے عزتِ صدیق
نبی رسول و پیمبر کے بعد افضل وہ
سبھی امم میں نرالی ہے رفعتِ صدیق
عمر نے ، عثماں نے چاہا تمام عمر انھیں
علی کے دل میں رہی خوب الفتِ صدیق
نبیِ پاک کے پہلومیں دفن ہیں بے شک
بہ غور دیکھیے کیسی ہے شوکتِ صدیق
متاعِ کُل شہِ لولاک پر لٹا ڈالی
پسندِ رب ہوئی کیا خوب دولتِ صدیق
تباہی دونوں جہاں میں بنے گی ان کا نصیب
سیاہ دل میں جو پالے ہیں نفرتِ صدیق
وہ یارِ غارِ پیمبر وہ صادق و اصدق
بیان کرتے رہو خوب عظمتِ صدیق
لٹا ئی غار میں جاں راحتِ پیمبر پر
حصارِ عشق و محبت تھی ہجرتِ صدیق
نہ چھوڑا ان کو جو انکارِ فرض کر بیٹھے
عیاں ہے حق کے لیے خوب شدتِ صدیق
ہوئے صحابہ میں ماں، باپ ، بیٹے ،پوتے بھی
یگانہ شان کی حامل فضیلتِ صدیق
ہے نام لیوا یہ اصحاب و آلِ اطہر کا
ملے گی کیوں نہ مُشاہدؔ کو برکتِ صدیق